शिवसूर्यहृदय

||शिवसूर्यहृदय||

जधीं दाटतो पूर्णतः अंधकार|
दिसे मार्ग ना लक्ष सर्वस्वी दूर||
अश्या संकटी कोणी ना घाबरावे|
शिवाजी चरित्रास भावें स्मरावे||१||

असंख्यात गेले विरोधात लोक|
तरी घालणे ना यमाला ही भिक||
जरी सागरा एवढे म्लेंछ आले|
शिवाजी आणि मावळे नाही भ्याले||२||

करी घेऊ ते कार्य सिद्धिस नेऊ|
असा सह्य निर्धार चितांत ठेऊ||
शिवाजी आपत्ती पुढे नाही झुकले|
जगी हिंदवी राज्य निर्माण केले||३||

सुखाला आधी लाथ मारा धृतीने|
उठा मार्ग चाला कड़या निश्चयाने||
जगी गांडूळा सारखे ना जगावे|
उरी बाजीतानाजीला संस्मरावे||४||

नका भिक घालू कधी संकटाला|
उठा ठोकरा येई ते ज्या क्षणाला||
मनाला नसावा कधी भीती स्पर्श|
जिजाऊसुतांचा जगया आदर्श||५||

महामंत्र आहे न्हवे शब्द साधा|
जयांच्या स्मृतीने जळे म्लेंछ बाधा||
नुरे देश अवघा जयांचे अभावी|
शिवाजी जपु राष्ट्र मंत्र प्रभावी||६||

जिथे मोगरा तेथे राहे सुवास|
जिथे कृष्ण तेथे जयश्री निवास||
शिवाजी जपु मंत्र आर्त मतिनी|
शिवाजी तिथे माय तुळजाभवानी||७||

चहु बाजूने वादळे घेरतील|
कुणीही सवे सोबतीला नसेल||
दिशा वाट सर्वस्वी ही हारविता|
शिवाजी असे मंत्र हा शक्तिदाता||८||

करी खड्ग घ्या धर्म रक्षावयाला|
यशस्वी करा दिव्य भगव्या ध्वजाला||
उठा फड़कवा दिल्ली वरती निशान|
स्मरा अंतरी नित्य शिवसूर्यआण||९||

उरी ध्येयज्वाला असे पेटलेली|
अश्यांना करी लागती ना मशाली||
रवि नित्य तेवे विणा तेलवात|
अशांची शिवाजी असे जन्मजात||१०||

स्वभाषा स्वदेशा स्वधर्मास्तावे जे|
स्वभाग्ये ईथे जन्मलो मानिती जे||
असा जन्महेतु जयांच्या उरात|
अश्या ची शिवाजी असे जन्मजात||११||

घराच्यावरी ठेवुनी तुळशीपत्र|
उरी धगधगे हिंदवीराज्य मंत्र||
जरी प्राण गेला तरी नाही खंत|
अश्यां ची शिवाजी असे जन्मजात||१२||

जरी घेरती वादळे संकटांची|
इतिश्री कराया पुरया जीवनाची||
रणी पाड़ती जे यमाचे ही दात|
अशांची शिवाजी असे जन्मजात||१३||

कुठेही कधीही कुणाचीही कांता|
तरीही तिला मानिती जन्ममाता||
असे जान्हवीवत् सदा शुद्ध चित्त|
अशांची शिवाजी असे जन्मजात||१४||

स्वधर्मास्तावे जे करी खड्ग घेती|
अरी जाळण्याला स्वये आग होती||
पिते शस्त्र ज्यांचे रणी शत्रुरक्त|
अशांची शिवाजी असे जन्मजात||१५||

पथी दाट अंधार काटे सराटे|
मनी संकटांची क्षिती शून्य वाटे||
मरुताहुनी धावती जे नितांत|
अशांची शिवाजी असे जन्मजात||१६||

उरी राष्ट्रभक्ति रविवत ज्वलंत|
न ये भीती चित्ती जरी ये कृतांत||
सदा सिद्ध करण्या रणी म्लेंच्छअंत|
अशांची शिवाजी असे जन्मजात||१७||

अदित्यास ठावा नसे अंधकार|
जयाना तसा स्पर्शतो ना विकार||
असे वज्रनिर्धार ज्यांच्या उरांत|
शिवजी असे आमुची जन्मजात||१८||

जरी प्राण गेला तरी शब्द पाळू|
अविश्रांत देशस्तवे घाम गाळू||
हटू ना फिरू मागुती सत् पथात|
अशांची शिवाजी असे जन्मजात||१९||


नव्हे अन्नपाणी नव्हे स्वर्णखानी।

आम्हां ना जगी रोखु शकतात कोणी।।

नसें हिंदू राष्ट्राविणा सत्य अन्य।

नसें हिन्दु राष्ट्राविना देव अन्य।

तदर्थी आम्ही प्राशीले मातृस्तन्य।।२०।।